Administrata Tatimore e Kosovës njofton të gjithë tatimpaguesit borxhlinj se ka hyrë në fuqi Rregullorja e Brendshme për Procedurat e Organizimit dhe Funksionimit të Menaxhimit të Mbledhjes së Borxheve, me qëllim të rritjes së efikasitetit, transparencës dhe trajtimit të drejtë e proporcional të të gjitha rasteve të borxheve tatimore.
Në bazë të kësaj Rregulloreje, procesi i menaxhimit dhe mbledhjes së borxheve tatimore do të zhvillohet në mënyrë të strukturuar, përmes divizioneve përkatëse të ATK-së, duke synuar nxitjen e pagesës vullnetare, komunikimin e hershëm me tatimpaguesit dhe ofrimin e mundësive për përmbushjen e obligimeve tatimore.
Mundësia për pagesë me këste dhe përfitimet për tatimpaguesit
ATK inkurajon tatimpaguesit të cilët kanë vështirësi financiare, por shprehin gatishmëri për përmbushjen e obligimeve tatimore, që të aplikojnë për marrëveshje për pagesë të borxhit me këste gjatë fazës së trajtimit në Divizionin për Shërbime Mbështetëse dhe Mbledhjen e Borxheve.
Tatimpaguesit që trajtohen në këtë fazë përfitojnë:
- kushte më të favorshme për pagesën e borxhit;
- fleksibilitet në pagesë;
- shmangie të masave të sforcuara;
- mundësi më të madhe për zbritje të gjobave.
Masat ndaj tatimpaguesve që nuk bashkëpunojnë
Tatimpaguesit të cilët nuk e paguajnë borxhin dhe nuk lidhin marrëveshje për pagesë të borxhit me këste me ATK-në, do të transferohen automatikisht në Divizionin për Masa të Sforcuara të Mbledhjes. Në këtë fazë mund të ndërmerren masa detyruese ligjore, përfshirë:
- konfiskimin e pasurisë;
- shitjen e pasurisë së konfiskuar;
- veprime të tjera të parashikuara me legjislacionin tatimor në fuqi.
Nëse tatimpaguesi kërkon lidhjen e marrëveshjes për pagesë të borxhit me këste pasi rasti të ketë kaluar në këtë Divizion, ai/ajo duhet të paguajë minimum 40% të borxhit tatimor të papaguar.
Përfitimet nga pagesa vullnetare
ATK rikujton se përmbushja me kohë e obligimeve tatimore sjell përfitime të drejtpërdrejta për tatimpaguesit:
- Tatimpaguesi që bën pagesë të njëhershme të detyrimit tatimor (bazës dhe interesit) përfiton zbritje të gjobave prej 70%;
- Tatimpaguesi që respekton marrëveshjen për pagesë të borxhit me këste përfiton zbritje të gjobave prej 50%.
Administrata Tatimore e Kosovës mbetet e përkushtuar për të ofruar mbështetje, këshillim dhe trajtim të drejtë për të gjithë tatimpaguesit, duke synuar rritjen e përmbushjes vullnetare dhe sigurimin e barazisë fiskale.
Zgjidh pagesën vullnetare, fito lehtësime dhe qetësi!
Administrata Tatimore e Kosovës
